Accueil SPORT

KISA N AP FÈ AK ESPÒ A ? : KIJAN LÒT PEYI YO FÈ ESPÒ A ?

64

Tout moun konnen espò a se yon bon mwayen pou devlopman, anpil peyi pa ranse ak kesyon sa, gen peyi li reprezante jiska 5% nan PIB yo. Soti nan envestisman pase nan ankadreman jèn talan yo tonbe nan òganizasyon jis rive nan jwisans, ann fè yon kout je sou kijan kèk lòt peyi fè espò lakay yo.

Yon bon mwayen pou devlopman, wi, nou tout konn sa, menm dirijan ki nan sektè a konn sa. Poukisa lè yo rive nan plas pou yo fè yo toujou gen difikilte ?Gen anpil peyi malgre espò lakay yo manke enfliyans, yo envesti enèji yo nan espò lòt peyi pou chèche avantaj pa yo. Espò a se youn nan mwayen ki mete yo deyò, paske bon fonksyònman espò a benefik pou yon pakèt lòt sektè tankou : travay, touris, medya, piblisite, elatriye…

Fikse objektif ou, menm nan lavi yon jèn sa enpòtan anpil pou motivew e pèmèt ou reyalize sa kap bon pou ou.Lachin ki se youn nan pi gwo peyi ki gen nan mond lan, se youn nan peyi ki enfliyan anpil prèske sou tout mache yo.
Yo bay tèt yo misyon pou yo òganize yon koupdimond football nan deseni kap kòmanse an 2030 lan. Avan 2050 yo sipoze gen twofe sa nan palmarès yo, selon objektif yo fikse.

Yo gen anpil bèl talan nan espò endividyèl fizik e teknik yo, tankou : karate, jido, kongfou, tangsodo ak lòt ankò, nan football se diferan.

Pou rezon sa yo met kò yo deyò pou yo chèche gen kontwòl mache a pou ede pa yo a grandi e fè pwofi tou sou kèk lòt fòm. Yo pa egare yo menm.An ewòp, chinwa yo ap dirije yon pakèt klèb, genyen yo propriyetè yo nèt, genyen se aksyonè yo ye, gen klèb tankou : Wolverampton, Lyon, Espanyol de Barcelona, Man.City, Athletico de Madrid.

Yo ale an afrik yo konstui plis pase 50 estad nan anviwon 30 peyi, youn nan estad referans yo se estad ki nan Libreville, kapital peyi Gabon, estad ke yo rele « Stade de l’amitié ».

Nou pa gen mwayen pou gwosè bagay sa yo, men nou ka fikse objektif nou lakay nou poun regle zafè nou, pavre ?

Ann fè yon kout pye nan peyi ameriken yo, nou konnen moun sa yo pratike anpil espò, sa ki pi popilè yo se fooball ameriken, Basket-ball, football(soccer), volleyball.NCAA ki se (Association athletique nationale des collèges) se yon estrikti kap fè yon gwo bout travay nan espò ameriken an.Yo kwafe anviwon 1281 lekol ak asosiyasyon, yo òganize tout espò yo nèt. Anpil gwo moun ki fè non yo nan milye espòtif la te pase anba estrikti sa, si n ka konsidere moun tankou : Michael Jordan ki se youn nan pi gwo basketè mond lan konnen, Cyle Larin ki se atakan epip kanada a, aktyèlman kap jwe anndan ekip Besiktas la nan peyi Latiki, nèg sa te ba nou 5 gòl pandan ane 2021 an, 3 gòl nan faz eliminatwa koupdimond, 2 gol nan GoldCup la.
Genyen tou Gyasi Zardes ki se atakan Columbus Crew, koyekipye youn nan grenadye yo ki se Derrick Étienne.

Avan 2010, estrikti sa te anviwon 6milya dola vèt kap bwase ladanl. Gwo koze !

Gen anpil lòt peyi ki kreye anpil estrateji pou pèmèt espò a itil nan tout sans.
M pa bezwen refè deskripsyon sou jan nou jere sa bò lakay nou.

Se pa san rezon n ap wè Jamayik kenbe atletis mondyal la anba zèl li, gen anpil travay ki fèt pou sa. Usain Bolt se youn nan atlèt ki pi enfliyan nan mond espòtif la, li se yon atlèt jamayiken.Atletis la se yon disiplin espòtiv ke yo anseye menm nan lekòl primè nan peyi jamayik. Matyè sa gen menm enpòtans avek ni matematik ni lang.Jounen jodia gen anpil peyi tankou Kata ki se pwochen oganizatè koupdimond football ki konn ofri yon pakèt lajan pou talan jamayik yo ka chanje nasyonalite yo pou yo vin katari.

Yon talan pa tou siksè ni tou lajan men li mande anpil transfòmasyon pou l atenn nivo ke yo konsidere kòm siksè a.Yon disiplin espòtiv se yon kilti, se nòmal pou l ap grandi tanzantan nan sosyete a. Si yon peyi pa pwogrese nan disiplin espòtiv ke l pratike plis la ebyen nou ka di peyi sa se yon peyi kap dekiltire.

Anpil peyi pwofite de talan espòtif yo pou eseye soti tèt yo, paske espò a bay yon pakèt lòt relasyon ( al li epizòd 2 a )An Ayiti nou pran tout bagay pou chans, nou pa janm prepare anyen epi nou toujou espere kichòy.

Si se konsa sa te ye poukisa lòt peyi ki gen plis save pase nou yo envesti lajan, tan ak enèji yo pou yo fè siksè nan yon domèn kèlkonk ?
Bann foulay

*Wolf Kenley DENIS*
*[email protected]*